managlahi na ang atong dalan

managlahi na ang atong dalan 

sayang, sayang ang tanan

kay ikaw misimang na sa kaligdong

ug katarong. nalibog ko nimo amigo

kataas sa mga katuigan nga ikaw

nagsunog sa imong kilay diha sa

dinaginot nga kandila

giantos mo ang kagutom 

og kauhaw

ug nakab-ot mo ang gahom

nga gihatag sa mga

makatarunganon

karon ania ka

nagpaitoy-itoy sa usa ka

bugo nga politiko nga andam

na sa pagamit kanimo

gitunulan ka sa salapi

nabudlat ang imong mga mata

gisulod mo kini sa imong bulsa

nga walay busganan

karon kon mosenyas siya

nga mosayaw ka

paspas kang mosayaw

mora kag iro nga nagpaitoy-itoy

nagpakitoykitoy sa imong ikog

naghandom nga unta kining amo

nga bugo malipay kanimo

gilabayan ka na usab ug

bukog ug imo kining gitangag

ug gitagoan sa ilalom sa

salog sa imong balay

nahimo ka na nga iro

nga kon duna man gani hait nga ngipon

giandam mo lang kini

sa sugo sa imong among bogo

pagkawalwal mo

pagkasayang gayod sa gahom nga imong

naangkon

nahimo kang iro nga ug

suguon ug paghot

mopaghot ka usab

(balak ni RSB)