Ang Kataposang Pasko, sa Belen
Way hudyaka sa hinangpanay, way kipatkipat
Sa mga nagpakaron-ingnong bitoon, way lumpat
Sa kakundat, way lanog
Sa daygon, way huning nanuhotsuhot
Sa mga mangiob nga puluy-anan.
Bisan ang tun-og, sa iyang tumong ug tinguha
Gikan sa taluktok sa panganod,
Wa manumbaling
Sa pagkahimugso sa Bata.
Karong gabii, Sugbo, kon ugaling,
Sa kahayag nga mibuhagay sa imong sabakan
Dag-on ka sa kahigwa-os nga dili matukib,
Magapos sa ngadtongadto ang kasingkasing
Sa lit-ag sa alimungaw.
Ingnon ta nga ang mga nagpakakahoy
Nga gibiliksan sa tumang dayandayan
Hagit sa kaibog sa mga timawa, lamat
Sa pangandoy sa mga kabos.
Ingnon ta nga ang tawong tambok, putig bungot
Nga sa kanunay gipapas-ag mga gasa
Alang konohay sa mga kabataan
Bunga lang sa banabana.
Ingnon ta nga ang gilak sa bahandi
Maoy mga yamog nga salingkapaw
Ibabaw sa mga balili sa kasina.
Unta ang mga lingganay ug mga parol
Motukbil sa tanlag, moalam-alam sa hunahuna
Aron makigbinaylo-ayg kasingkasing
Ang mga kabubut-ong nagkabangi.
Sa kinatumyan sa kahilom
Nabuskad ang panganod,
Nahimugso ang Bata,
Bitoon Iyang takoban, ang Iyang balon
Bahihi sa karnero. Bugnaw ang batong abohan.
Way pastores alirong sa pasungan.
Way kagahob nga miwatagwatag
Sa mingaw nga uha sa Bata.
Way mananabang nga nanghimusod.
Ang Iyang inunlan gihiklin
Tipon sa mga uhot nga trigo.
-- RENE ESTELLA AMPER
Boljoon, Cebu, Philippines
Si Rene Estella Amper usa ka Sugboanonng magsusulat sa pinulongang Iningles ug Binisayang Sinugboanon. Lumad nga taga Boljoon, Sugbo kinsa natawo niadtong (?) ug mitaliwan niadtong Enero 24, 2007 tungod sa kanser sa kolon.
Gradwado si Amper sa medisina sa Southwestern University diin nahimo siyang editor-in-chief sa The Quill, official student publication sa maong unibersidad.
Writing fellow siya sa nabaniog na kaayong Silliman National Writer’s Summer Workshop nga didto himoa sa Silliman University, Dakbayan sa Dumaguete, sa Mayo 1968 kauban nila ni Urias Almagro, Lamberto G. Ceballos, Rene Bonsubre, ug Dionisio R. Gabriel, laing mga magsusulat nga Bisaya.--Wikipedia
No comments:
Post a Comment