Ang Galamhan
mugna ni Bason Di-ay
Haw-ang ang hangin.
Way timik ang lim-aw
diin miunlod ang anino.
Ug ang balilihan mikunhod
sa dihang hingkod
na ang kangitngit
Ang kunuhay'ng makinaadmanon
misalikway sa
kalawom sa galamhan
nga kung tuki-on
may tubod nga molapas
pa sa kamatayon
Sa dihang ang
kahayag sa bulan
inanay'ng napalong
ug misambog na sa banagbanag,
miusbaw ang mga
nahi-agom nga nahikalimot
na sa ilang damgo
Mabaw ang akong pagkatulog.
Ang akong amahan
nabuhi apan gilansang
pag-usab sa krus
Mga luha'ng mituhop
sa lumalabay nga
kagabhion
way sangkoanan...
No comments:
Post a Comment